专家拆局：C朗扎住上葡萄牙焗献细

今晚欧国外B组强弱悬殊之战，由「2哥」葡萄牙主场迎战包尾嘅立陶宛。葡萄牙王牌C朗有伤在身，而且于主场面对死守球队，经常老鼠拉龟冇碇埋手，相信今仗又煲鱼生粥仅仅熟，转捧3.5球嘅入球细。

葡萄牙上轮爆冷输畀榜首乌克兰，令后者提早出线，依家葡军仍领先「3哥」塞尔维亚1分，只要馀下两轮赢晒，就毋须理会对手肯定晋级。呢支上届盟主虽有C朗助阵，弊在这名祖云达斯射手因膝部有伤，上仗联赛对AC米兰，因安全起见被提早换出，事实上佢近5仗入1球，明显状态麻麻，加埋「新C朗」祖奥菲历斯及干卡路古亚迪斯更因伤落选，甚至要重召久未入选嘅中锋艾达卢比斯，唔多靠得住喎。

立陶宛摆铁桶死守

立陶宛今届欧国外7战仅得1和6负，于B组排包尾，其中近5仗全败，毫无还手之力。不过葡萄牙一向靠C朗单天保至尊，若果佢冇态必令攻力大打折扣，尤其是主场面对龟缩球队，总係缺少破铁桶阵板斧，连同上届在内，近7次欧国外主场出击，只入8球，全开3球或以下，包括上次主场只赢弱旅卢森堡3:0，预计今仗都係小胜格局，捧3.5球嘅细盘更上算。